Pennrynn a dal dalleth hy fara rugbi, mars yw gwir an kovyow koth, dhe wrier euryow ha gusigen hogh.
Hanow an gwrier euryow o John Marshall Thomas, hag yn 1872 ev a dehwelis dhe Bennrynn dyworth Loundres may hwrussa ev spena y dermyn yn unn tyski puptra a-dro dhe glockow hag euryow, ha dos ha bos gemweythor.
Pan esa ev yn Loundres rugbi a dheuth ha bos dhe les dhodho, yn y dermyn rydh. Ev re warsa rag Ros Dhu ha pan dhewelis ev dhe Bennrynn ev a welas, war gay an dre, bos tus yowynk an vurjestra ow potya a-dro pel bilen yn gis garow rugbi. Tus skath hir, seri men ha porthoryon an kay ensi, an hanow yn dedhyow na, rag tus an porth.
John Marshall Thomas a brofyas bos gusigen hogh hwythys gwell es pel bilen. “ Gans neppyth rag hy gwitha” yn-medh ev. “Gorheras?” yn-medhons. Ytho, i a erviras gul devnydh a gweth gool kanvas hag o es dhe gavos, hag i a hwythas der arr a bib bri terrys rag hwytha an wusigen, ha rugbi ordenys yn Pennrynn a veu genys.
Mes nyns yw denvyth certan p’eur tallathas rugbi yn Pennrynn. A dhallathas ev pan dhewelis John Marshall Thomas yn 1872 ( ev a gomendyas ankrysyow rudh ha du dyworth Ros Dhu dhe Bennrynn) po a dhallathas pan warias para dyworth an garth growan teythyek Freemans erbynn para dyworth teudhla Sara yn gwel ogas dhe’n ostel “Alhwedhow Krowsys”.
Nyns yw denvyth certan mes Pennrynn a solempnyas yn sodhogel y benn kansbloodh yn 1972.
Hedhyw, Pennrynn yw a moyha henavek yn-mysk klubys Kernow oll hag ev re ventenas bri a yll tus perthi avi orti, hag yn gis unnik ev re ventenas kolmow an krevva gans an dre vyghan hag a ros dhodho dinythyans.
Meur ras Duane Glasby
